نهاية زمن الدولار وتفاصيل الأيام الصعبة للوحش ...

بانكير 0 تعليق ارسل طباعة تبليغ حذف

وحدة أبحاث بانكير قدمت عدد من التقارير والأخبار على منصاتنا، البداية بتقرير خاص عن ايام الدولار الصعبة في الفترة الجاية. 

وشرح التقرير  إن مصر عاشت أيام صعبة مع الدولار خاصة في الفترة اللي جت بعد الأزمة الروسية الأوكرانية وهروب الأموال الساخنة وظهور فجوة بين المعروض والمتاح من النقد الأجنبي وتحديدا الدولار ودا خلق ظروف مثالية لظهور مافيا تجارة العملة وشفنا ارتفاعات قياسية في سعر الورقة الخضراء.

ولفت التقرير إن من قلب المحنة مصر اتحركت بقوة من خلال بنك مركزي قوى وقدرت على مدار الشهور اللي بعد الأزمة في السيطرة على الوضع بإجراءات سريعة فورية وطويلة المدى.

وأشار التقرير إن البداية كانت من إصلاح الخلل في سوق الصرف اللي خلى الدولار يهرب للسوق السوداء والمركزي خد قرار جريء جدا في مارس 2024 بتحرير سعر الصرف ودا كان بالتزامن مع إجراءات ومبادرات تانية كتير لوقف نزيف العملة الأمريكية.

وقال التقرير إن الدولة بدأت بخطط طموحة لتوطين الدولار وزيادة موارد الدولة الدولارية من كل القطاعات وتعظيم الاستفادة من خلال تطوير أهم 5 قطاعات بتدخل دولار لمصر وشفنا التطوير اللي حصل في السياحة ومشروعات توسيع قناة السويس وتقديم خدمات جديدة رغم الأزمة اللي بتمر بيها.. كمان الدولة هيأت كل الظروف لجذب الاستثمارات الأجنبية والعربية وزيادة تحويلات المصريين بالخارج.. ودا غير خطة توطين الصناعة وزيادة الصادرات.

وشرح بانكير إن كل المؤشرات بتقول إن التدفقات النقدية الأجنبية هتستمر في الزيادة وتوقعات بحدوث قفزات متتالية في واردات الدولار وفي كل قطاع من القطاعات الخمسة الأساسية متوقع تحقيق طفرات دولارية زي المتوقع في القطاع السياحي الموسم دا مع استكمال مشروعات مهمة جدا زي افتتاح المتحف المصري الكبير ومشروع التجلي الاعظم والقاهرة الفاطمية وغيرها من المشروعات الترفيهية في الساحل الشمالي والبحر الأحمر.

وتوقع التقرير كمان قفزات كبيرة في ملف الاستثمار الخارجي مع التسهيلات الكبيرة اللي بتقديمها الحكومة في الملف دا ونفس الأمر في قطاع التصدير واللي بيشهد زيادات مضطرة في الأرقام وكمان متوقع عودة قريبة لقناه السويس بعد الاتفاق الأمريكي الأخير مع الحوثيين وعودة حركة الملاحة بكامل طاقتها.. وشفنا القفزة التاريخية في قيمة تحويلات المصريين بالخارج واللي حققت 33 مليار دولار تقريبا.

وقال التقرير إنه مع انتهاء مصر من تسديد ديون 2025 وهي اخر ديون خارجية ضخمة هيتم تسديدها في سنة واحدة متوقع حدوث وفرة كبيرة في معروض الدولار.. ودا معناه باختصار انخفاض مستمر في سعر الدولار في الشهور الجاية من السنة الجارية واللي هتكون سنة انتهاء سطوة الوحش الأخضر الأمريكي.


منصات بانكير قدمت تقرير خاص النهاردة عن زيادة التدفقات الاستثمارية في مصر .

وقال التقرير إنه في الساعات الأخيرة الدكتور مصطفى مدبولي رئيس الحكومة واصل جولاته في المنطقة الاقتصادية لقناة السويس والنهاردة زار منطقة السخنة المتكاملة التابعة للهيئة العامة للمنطقة الاقتصادية... وافتتح مصنع شين شينج الصيني للمواسير المصنعة من حديد الدكتايل باستثمارات 150 مليون دولار وافتتح  كمان توسعات شركة هيات إيجيبت التركية للمنتجات الصحية باستثمارات 60 مليون دولار  وهو مصنع لإنتاج المناديل الورقية من مواد غير نسيجية ويقع داخل نطاق المطور الصناعي أوراسكوم للمناطق الصناعية بمنطقة السخنة الصناعية التابعة للهيئة.

ولفت التقرير إنه على هامش الجولة شهد مدبولي مراسم توقيع عدد من الاتفاقيات خلال الجولة... ولو حضرتك تابعت الجولة ودخلت على جوجل وكتبت المنطقة الاقتصادية لقناه السويس وبحثت عن التفاصيل هتعرف أن المنطقة دي بتعتبر مستقبل الاقتصاد المصري وأنها مشروع عملاق متكامل وهيغير خريطة الاقتصاد المصري.. وكفاية نعرف إن المنطقة الاقتصادية دي استقبلت حوالي 8 مليار دولار استثمارات صناعية لغاية دلوقتى ولسه كل يوم بتستقبل استثمارات جديدة ومتوقع تكون مركز صناعي ولوجستي ضخم في المنطقة كلها وتحقق عوائد وقبمة مضافة كبيرة جدا للاقتصاد المصري وتقدر تقول إن المنطقة الاقتصادية لقناه السويس هتكون رأس الحربة للاقتصاد المصري وقوة الدولة المالية في الفترة الجاية...

وقال تقرير بانكير إن أهمية المنطقة الاقتصادية لقناه السويس في كونها بتتمتع بموقع استراتيجي مش موجود منه اتنين في العالم كله ودا بسبب قربها من قناه السويس أهم ممر ملاحي في العالم وقربها من المواني المصرية العملاقة ومناطق الللوحستيات وقربها كمان من كل الأسواق العالمية وعشان كده فيه سباق كبير من المستثمرين الأجانب والعرب للحصول علي فرصة لإقامة مشروعات وشفنا الصين ازاي بدأت بمنطقة صناعية كبيرة هناك وبعدها روسيا أقامت المنطقة الصناعية الروسية ولسه المليارات بتهل على المنطقة وعشان كده الدكتور مدبولي ليه اكتر من يوم بيلف في المنطقة الاقتصادية لقناه السويس لأن مساحتها ضخمة وبتوصل إلى460 كيلومتر مربع وهدفها جذب الشركات العالمية في مجالات التصنيع والخدمات اللوجستية وتكنولوجيا المعلومات.


وأشار التقرير لتأكيد مدبولي على حرص الدولة المصرية على توطين الصناعة ونقل التكنولوجيا بالقطاعات ذات الأولوية وخاصة  القطاعات اللي بتمثل خفض للفاتورة الاستيرادية وتسهم في دعم احتياجات السوق المحلية والمشروعات القومية بالإضافة إلى مساهمة توطين  الصناعات دي في تعزيز الصادرات للأسواق الإقليمية والعالمية.

وسلط التقرير الضوء على تصريحات رئيس الهيئة المنطقة الاقتصادية لقناه السويس وليد جمال الدين واللي قال فيها إن فيه اكتر من 130 مشروع حت الإنشاء حاليًا داخل الهيئة وإن العمل متواصل داخل الهيئة لتعظيم الاستفادة من الموقع الاستراتيجي للمنطقة ومقوماتها التنافسية.. القيمة الحقيقية اللي هتضيفها مشروعات المنطقة الاقتصادية لقناه السويس هتظهر اكتر لما تكتمل اغلب المشروعات العملاقة اللي فيها وهنشوف مصر في حتة تانية لما المصانع الجديدة هتشتغل والموانئ تنتعش وحركة التجارة تتضاعف في المنطقة وتزيد معاها القيمة المضافة لقناه السويس نفسها.

وحدة أبحاث بانكير قدمت تقرير خاص النهاردة عن مصير أسعار الدهب واللي هيحصل في يوم 22 مايو الجاري..

وقال التقرير إنه في يوم 22 مايو اللي جاي  لجنة السياسة النقدية في البنك المركزي المصري هتجتمع لبحث مصير سعر الفائدة ودا بعد خفضها في الاجتماع اللي قبله بشكل ملحوظ.. ولو بتسأل ايه علاقة سعر الفايدة بالذهب.. هنقول لحضرتك أن فيه علاقة مباشرة بينهم لأن لو المركزي قرر يخفض الفايدة في اجتماعه اللي جاي مثلا يبقي  الطلب على الدهب هيزيد بشكل ملحوظ وسعره هيرفع لأن خفض الفايدة بيشجع أصحاب المدخرات والسيولة على الاستثمار في المعدن الأصفر لانه أكثر جدوى وربحية..

وسلط التقرير الضوء على أهم توقعات قرار لجنة السياسة النقدية في اجتماعها القادم وقال إن اغلب خبراء الاقتصاد شايفين أن المركزي ممكن يثبت سعر الفايدة بسبب أرقام التضخم اللي زادت بعد ارتفاع أسعار الوقود وفيه رأي شايف إنه ممكن يخفض بشكل بسيط ولغاية ما يطلع قرار المركزي لو معاك دهب استني لغاية ما تشوف القرار هيقول ايه.

إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.

إخترنا لك

أخبار ذات صلة

0 تعليق