يا ترى إيه اللي بيحصل في كواليس اجتماعات الرئيس السيسي مع رئيس الوزراء مصطفى مدبولي ومحافظ البنك المركزي حسن عبدالله؟ ,ليه الاجتماعات دي بتتكرر كل شوية؟  وإيه سر اهتمام الرئيس بنفسه بملف احتياطي الدولار؟ .. وازاي مصر بتحاول تجذب المستثمرين الأجانب في 2025؟

أول حاجة لازم نفهمها .. إن اجتماعات الرئيس مع كبار المسئولين فى مصر مش مجرد لقاءات روتينية .. دي بتبقى جلسات متابعة على أعلى مستوى ..وكل فترة  الرئيس السيسي بيجتمع مع مدبولي وحسن عبدالله عشان يراجعوا مؤشرات الاقتصاد الكلي  .. يعني بيبصوا على التضخم .. احتياطي النقد الأجنبي .. الديون .. الصادرات .. والاستثمارات .. وكل ده في ظل تحديات عالمية زي التوترات الجيوسياسية وتباطؤ الاقتصاد العالمي.

وفى الاجتماع اللى حصل فى الساعات الأخيرة  الرئيس ناقش معاهم أداء القطاع المصرفي وازاي يقوّوا احتياطي الدولار عشان يضمنوا استقرار السوق.

طيب ليه الرئيس مهتم شخصيًا باحتياطي الدولار؟

عشان الاحتياطي ده زي "الأكسجين" للاقتصاد المصري .. من غيره مش هنقدر نوفر السلع الأساسية زي القمح والأدوية والوقود .. ولا هنقدر ندفع التزاماتنا الخارجية .. في ديسمبر 2024 .. احتياطي النقد الأجنبي وصل لـ47.1 مليار دولار .. وده رقم قياسي تاريخي .. وده معناه إن مصر دلوقتي عندها سيولة دولارية كبيرة بتساعدها تواجه أي صدمات خارجية .. الرئيس بيحرص إن الاحتياطي ده يفضل في المنطقة الآمنة عشان يحمي الجنيه ويحافظ على استقرار الأسعار.

ونيجي للنقطة المهمة التانية .. ازاي مصر بتحاول تجذب الاستثمار الأجنبي المباشر؟

الرئيس السيسي بيوجه دايمًا بتوفير بيئة جاذبة للمستثمرين .. يعني إيه؟ .. يعني تقليل البيروقراطية .. تسريع الإجراءات .. وتقديم حوافز زي الرخصة الذهبية اللي بتسهّل على المستثمرين إنشاء مشروعاتهم .. في 2022 .. الرئيس طلب من مدبولي وحسن عبدالله يحلوا مشاكل المستثمرين في شهرين بالكتير .. وفي 2025 .. لسه التوجه ده مستمر .. الرئيس بيشدد على زيادة فرص القطاع الخاص والمستثمر الأجنبي .. وده بيظهر في مشروعات زي رأس الحكمة اللي جذبت مليارات الدولارات.

كمان .. مصر بتحاول تزوّد الصادرات عشان تجيب دولارات أكتر .. السيسي في 2022 قال إنه بيستهدف الوصول لـ100 مليار دولار صادرات .. وده بيتطلب تحسين بيئة الأعمال ودعم الصناعة .. البنك المركزي كمان بيلعب دور كبير هنا .. حسن عبدالله بيشتغل على توفير الدولار للمستوردين والشركات عشان يضمنوا استمرار الإنتاج وتقليل الأسعار في السوق .. وده بيساعد على جذب المستثمرين لأنهم بيبقوا مطمئنين إن السوق فيه سيولة دولارية.

طيب إيه اللي بيحصل في الاجتماعات دي بالظبط؟

بيناقشوا ازاي يخفضوا التضخم اللي وصل 24% في يناير 2025 .. وازاي يزوّدوا الاحتياطي .. وازاي يدّوا ثقة للمستثمرين الأجانب.. الرئيس بيحرص إن كل الجهات تشتغل مع بعض .. الحكومة .. البنك المركزي .. والقطاع الخاص .. كلهم لازم يكونوا في نفس الصفحة.

وخد بالك الاجتماعات دي بتظهر إن الرئيس السيسي عينه على كل التفاصيل .. من احتياطي الدولار لحد جذب الاستثمار .. كل ده عشان يضمن إن الاقتصاد المصري يفضل قوي ومستقر.