عمرو أديب يرد على رسالة شوبير: الزمالك ميتقالوش "هارد لك"

قال الإعلامي عمرو أديب، إنه تلقى رسالة من الكابتن أحمد شوبير عقب تتويج الأهلي رسميا ببطولة الدوري.

وقال أديب خلال برنامج "الحكاية" المذاع على قناة "أم بي سي مصر": "الرسالة بتقول هارد لك يا عمرو، أنا مش عارف كم مرة هضطر أبعتلك هارد لك، أنا بقول كابتن أحمد شوبير عشان الناس ما بتفهمش، بس أحمد شوبير إحنا علاقتنا إحنا أصحاب، أنا وأحمد عشرة، بحبه وبقدره وبحترمه، في بينا على مدى الحياة حاجات كتير".

وأضاف: "أحمد طيب وجميل، وهو مش قاصد يحفل عليا ولا يزعجني، بس لما تجيلك الحكاية دي من أحمد شوبير، فإنت جايلك من مصدر رسمي، أهلاوي، يعني الرسالة كانت فوقتني على حاجة مهمة".

وتابع: "هو المفروض أحمد ما يقوليش هارد لك، لأن تخيلوا هو الزمالك مالوش هارد لك؟ المفروض مين اللي يتقال له هارد لك؟ بيراميدز يا أحمد، انت بتقول لي أنا هارد لك على إيه؟ إحنا ولا حاجة، ما عملناش حاجة".

وواصل: "الهارد لك دي تروح بيراميدز، ناس فرق نقطتين، مستنيين الحكم، كانوا متقدمين إنما إحنا، نادي الزمالك، لم نفعل شيئًا".

واستكمل أديب: "حتى يا أحمد، هارد لك دي كتير يا أخي وكرم منك، إنما إحنا ما عملناش حاجة إحنا قاعدين بنتعثر وبندفع فلوس عشان نوقف القيد، وعندنا مصايب وبلاوي زرقا كتير، عندنا مشاكل، عندنا لعيبة قديمة، مش عارفين نجيب جديد، ما معاناش فلوس، حالتنا صعبة".

وواصل: "إحنا مش هارد لك يا أحمد، يعني انت الهارد لك دي ابعتها لأي حد، وأنا عارف طبعا إنك مش هتبعت لحد في بيراميدز أي حاجة".

وأضاف: "أنا مقدر مشاعرك، ومقدر جمال مقصدك، لكن يا جماعة، النادي الأهلي يستحق الدوري فلوس، فلوس، فلوس جمهور، جمهور، جمهور لعيبة، لعيبة، لعيبة إدارة موجودة بقالها 20 سنة، 30 سنة، 40 سنة، ما بتتغيرش يوم أو يوم لأ وفرقة قايمة على فكر هجومي إحنا بننزل الملعب نهاجم، نكسب، نجيب أجوان".