مشروع هيغير خريطة الاقتصاد والتجارة في مصر وافريقيا.. ياترى ايه حكاية المشروع دا وليه مصر بتعمل قناة سويس جديدة على الأرض وفي قلب الصحراء وأزاي المشروع دا هيقلب موازين التجارة مع افريقيا.

مصر بتعمل مشروعات عملاقة هتضيف قوة جديدة على الصعيد التجاري والمالي والاقتصادي ضمن خطط طموحة لغزو الأسواق القريبة والمفاجأة السارة أن أغلب المشروعات دي قربت تخلص والشركات المنفذة بتسابق الزمن عشان تخلص حتى قبل معادها..

من بين المشروعات الضخمة دي  مشروع خط السكة الحديد التاني اللي بيربط بين 6 أكتوبر وأبوسمبل في الجنوب وهو مشروع نقل عملاق يمر على محور التنمية الذي ابتكره العالم المصري الكبير فاروق الباز من سنين ومصر خدت وقت كبير عشان تبدأ فيه بسبب مشكلات التمويل لكن المستحيل قرب يكون حقيقة على أرض الواقع.. ونرجع للمشروع العملاق وعشان تعرف قد ايه هو مش مجرد خط جديد في شبكة السكك الحديدية محطة أبو سمبل دي هتكون محطة محورية جديدة هتربط بين مصر والسودان واريتريا وجيبوتي والصومال ودول شرق أفريقيا بخط لوجيستي عملاق  وخط تاني بيربطها بجنوب السودان ويمتد بعدها لجنوب افريقيا  ضمن مشروع القاهرة كيب تاون.

يعني باختصار كده الخط الجديد للقطارات السريعة بيعتبر قناة سويس جديدة لكن في قلب الصحراء هينقل ملايين الأطنان من البضائع بين مصر والدول في قلب القارة الأفريقية واللي بدأت فيها نهضة اقتصادية كبيرة ودا غير امتلاكها ثروات ضخمة بدأت تستغلها في التصنيع والتصدير وكل دا هيمر من خلال مصر واللي هتتحول لمركز إقليمي لإعادة تصدير المنتجات دي للخارج.... والنهاردة  بدأت على الارض ملامح الممر اللوجيستي الدولي لمشروع الربط السككي بين مصر والسودان واللي بيهدف لربط  مدينة أبو سمبل المصرية بمدينة أبو حمد السودانية، بتمويل ومنحة كويتية.

مشروع القطار المصري الجديد العملاق هيكون أشبه بمشروع خط الحرير الصيني لكن بشكل أفريقي وهيستخدم زي ما قلنا في نقل البضايع من وسط أفريقيا لمصر واللي هتكون محطة لوجيستية عملاقه للبضائع واللي هتستدعي بناء آلاف المصانع التحويلية الجديدة وملايين من فرص العمل في المستقبل.

وعلى فكرة الخط التاني للقطار السريع من أكتوبر إلى أبو سمبل هو جزء من شبكة القطار الكهربائي السريع اللي بتنفذها مصر دلوقتي وهي الأطول في الشرق الأوسط وأفريقيا بطول 1100 كم وبيتم تنفيذ المشروع بالتعاون مع تحالف مصري-ألماني يضم شركات سيمنز العالمية وأوراسكوم والمقاولون العرب وباستخدام أحدث التقنيات في أنظمة الإشارات والاتصالات والقطارات الكهربائية السريعة التي تصل سرعتها إلى 250 كم/ساعة.

قيمة استثمارات المشروع العملاق بخطين التاني والتالت بإجمالي 2000كم بتوصل لـ 23 مليار دولار ودا بيكشف لنا حجم المشروع وضخامته.. وفي وقت سابق أكد كامل الوزير وزير النقل إن المشروع بيعتبر جزء هام للربط مع السودان الشقيق اللى بيتم الربط معاها عن طريق 3 موانئ برية على الحدود المصرية السودانية وهى (قسطل- أرقين- رأس حدربة) بخلاف الطريق الملاحى (أسوان - وادى حلفا) عبر بحيرة ناصر وقيام وزارة النقل المصرية  بتطوير ميناء وادى حلفا فى السودان بإنشاء رصيف نهرى جديد بطول 400 متر، ضمن خطة الدولة المصرية للربط مع دول الجوار والدول الأفريقية .