سألت نسك قبل كده إزاي الاختراق البنكي بيحصل.. وإزاي البنوك بتعمل أعلى معايير الآمان عشان تحمي فلوسك .. طب انت تعمل ايه عشان محدش يعرف يهكر حسابك ولا يسطو على أموالك.
خلينا نبدا كده ونقولك الاختراقات البنكية.. بتحصل إزاي؟
بص يا سيدي.. الموضوع أبسط وأخطر مما تتخيل.. الهاكرز دول زي الحرامي الشاطر.. بيستخدموا طرق كتير عشان يوقعوك في الفخ زي التصيد الاحتيالي أو "الفيشينج" و دي أشهر طريقة.. تجيلك رسالة، إيميل، أو حتى مكالمة تليفون شكلها رسمي أوي.. يقولولك إحنا من البنك وعايزين نحدّث بياناتك أو فيه مشكلة في حسابك أو كسبت جايزة.. كل ده عشان ياخدوا منك بياناتك البنكية زي رقم الحساب الرقم السري أو الـ OTP (الرقم اللي بيجيلك على الموبايل) وأول ما تديهم البيانات دي يبقى فلوسك في خطر.
كمان فيه طريقة تانية وهي البرامج الخبيثة .. ممكن تحمل برنامج شكله مفيد أو لعبة مسلية أو تدوس على لينك مشبوه ومن غير ما تحس ينزل على جهازك برنامج خبيث بيراقب كل اللي بتكتبه وبيسرق بياناتك ومنها بيانات البنك.
فيه طريقة تانية ناس كتير ما بتاخدش يالها منها وهي السطو على الحسابات من خلال الواي فاي العام .. ودخ ممكن يحصل لما تستخدم أي شبكة واي فاي مفتوحة في كافيه أو مكان عام.. عشان كده خلي بالك الشبكات دي ممكن تكون مش أمان وسهل على الهاكرز يراقبوا كل اللي بتعمله عليها.
طب إزاي تحافظ على بياناتك؟
عشان تحمي نفسك ركز في النقط دي كويس.. ماتديش بياناتك لأي حد.. وخليك فاكر البنك عمره ما هيطلب منك الرقم السري بتاعك، ولا الـ OTP، ولا بيانات حسابك عن طريق تليفون أو رسالة. لو طلبوا منك ده، اعرف إنه نصاب فورا.
خليك حذر مع اللينكات الغريبة.. أي لينك يجيلك من مصدر مش معروف أو شكله غريب، ماتفتحهوش! حتى لو الرسالة جاية من حد تعرفه، ممكن يكون حسابه مخترق.
استخدم أرقام سرية قوية ومختلفة.. ماتحطش تاريخ ميلادك أو رقم تليفونك ككلمة سر. اختار كلمات سر صعبة، فيها حروف كبيرة وصغيرة وأرقام ورموز والأهم، خلي كل حساب بكلمة سر مختلفة.
راقب حساباتك باستمرار.. راجع كشوف حساباتك البنكية أول بأول ولو لقيت أي حركة مش طبيعية، بلّغ البنك فورا.
لو البنك بتاعك بيدعم خاصية فعّل التحقق بخطوتين فعلها على طول.. دي بتضيف أمان زيادة يعني حتى لو الهاكر عرف الباسورد مش هيقدر يدخل غير لما يدخل كود بيجيلك على موبايلك.
نيجي لنقطة مهمة إزاي البنك بيحمي فلوسك؟
البنوك بتستثمر مبالغ ضخمة عشان تحمي فلوسك وبياناتك وده بيحصل عن طريق أنظمة حماية قوية ومتطورة و البنوك بتستخدم أحدث وأقوى برامج وأنظمة الحماية ضد الاختراق، وبتحدثها باستمرار.
كمان البنوك بتستعين بفِرق أمن معلومات متخصصة شغلها بس مراقبة أي محاولات اختراق أو نشاط مشبوه والتعامل معاها فورًا.. بالاضافة الى ان كل بياناتك اللي بتتنقل بينك وبين البنك، بتكون مشفرة تمامًا.
وأهم حاجة المراقبة اللحظية للحركات المشبوهة.. أنظمة البنوك الذكية بتقدر ترصد أي حركة غير طبيعية على حسابات العملاء زي سحب مبالغ كبيرة فجأة أو محاولة دخول من أماكن غريبة وفي الحالة دي بيتم تجميد الحساب فوراً والاتصال بيك عشان يتأكدوا.
في الآخر لازم تعرف ان أمانك المالي مسؤوليتك ومسؤولية البنك.. البنك بيعمل كل اللي عليه وزيادة عشان يحميك.. لكن لازم أنت كمان تكون شريك في الحماية دي. خليك واعي وحذر وماتديش بياناتك لأي حد.. فلوسك أمانة.. حافظ عليها.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق