إحنا كنا فاكرين إن التسول بقى مهنة موسمية.. طلع شغلانة بدخل ثابت ومرتب مغري وشروط توظيف كمان.. وكله من جيوب المصريين !

لو رجعنا بالذاكرة لورا شوية هنسمع أغرب واطرف قصة عن متسول.. واحد في طلخا، محافظة الدقهلية، قرر يكسر كل قواعد اللعبة.. وقف قدام الكاميرا، وبدون أي كسوف، قالك: "أنا بجمع في اليوم 1200 جنيه، ورمضان بس بيخشلي فيه 50 ألف!

آه والله.. وعايز مساعد يمشي وراه وياخد 200 جنيه في اليوم! يعني شغلانة بـ 6 آلاف جنيه في الشهر.. في شوارع مصر مش برا مصر!

الناس اتصدمت.. وسموه على السوشيال: "أجرأ متسول في مصر".. الراجل ماكانش بيتكسف، ولا حتى بيخبي وشه.. بالعكس، بيقولك: أنا باشرب سجاير مستوردة.. ميريت!

بس بلاش تفرح قوي.. الداخلية اتحركت بسرعة، وقبضت عليه وهو بيشحت في بندر طلخا، ولقوا معاه 100 جنيه، وقالوله تعالى نرجع الورق!

طلع اسمه "ناصر"، عنده 56 سنة، ومن محافظة المنيا، بس ساكن حاليا في طلخا.. والسيرة الذاتية بتاعته مش بسيطة، مسجل في 5 قضايا قبل كده: نشل، مخدرات، آداب، تسول، وسرقة وسائل نقل.

يعني مش بس متسول.. ده كمان عنده سجل جنائي محتَرَم! لما النيابة سألته قالهم: "ده أنا كنت بهزر مع المصور.. أنا ببيع ليمون!" يعني فجأة الشحات اتحول لبائع ليمون! 

وقال كمان إن الفيديو كان هزار وإنه بيبدل الفلوس المعدنية من كشك سجاير! بس المباحث قالت.. لأ.. الحقيقة إنه كان بيتسول بقاله فترة، وفتحوله محضر رسمي برقم 5365 لسنة 2021.

القصة كلها بتقولك إن التسول بقى بزنس.. فيه تخطيط وشركاء ودخل في البنك كمان! يعني لو بتدور على شغل، خد بالك.. في ناس بتكسب أكتر منك وهي واقفة على ناصية الشارع وبتطلب "حاجة لله". بس ما تنساش.. القانون بيراقب، والنيابة شغالة، والتسول مش شطارة.. ده جريمة.. لأنك بتاخد فلوس الناس..