سمعت قبل كده عن "تاريخ X" اللي أمريكا كلها بتتكلم عنه دلوقتي؟ وليه التاريخ ده تحديدا قالب الدنيا عند الأمريكان؟ وإزاي تاريخ زي ده ممكن يخلي أقوى دولة في العالم  تعلن إفلاسها؟ .. وهل فعلاً الدولار ممكن قيمته تتبخر في الهوا؟ وهل اللي بيحصل ده هيأثر علينا فى مصر؟

وزير الخزانة الأمريكي سكوت بيسنت .. طلع من كام يوم في لقاء تلفزيوني .. وقال صراحة ان تخلف امريكا عن سداد ديونها  "مش هيحصل أبدًا" .. بس السؤال هي امريكا عليها ديون زي باقي الدول ؟ ولو فيه فعلا ازاى اقوى اقتصاد فى العالم مهدد انه ممكن يتخلف عن سداد الديون دي؟

تعالوا مع بعض نفهم الحكاية من الأول .. أمريكا عندها سقف دين .. يعني مينفعش تقترض أكتر منه .. وده سقف بيحدده الكونجرس .. والحزب الجمهوري في الكونجرس ربط رفع سقف الدين ده بمشروع قانون الضرايب والإنفاق .. اللي قدمه الرئيس دونالد ترامب .. يعني عشان أمريكا تقترض تاني .. لازم يتفقوا على مشروع القانون ده الأول .. وهنا المشكلة .. المفاوضات دي معقدة جدًا .. وممكن تاخد وقت طويل.

بيسنت رفض يقول إمتى بالظبط هو "تاريخ X" ده .. التاريخ اللي خزينة أمريكا هتبدأ تفضي فيه من الفلوس .. واللي بعدها مش هتقدر تدفع التزاماتها .. وده عشان يستخدموا التاريخ ده كورقة ضغط في المفاوضات .. الشهر اللي فات .. بيسنت قال للمشرعين إن أمريكا هتستنفذ صلاحياتها في الاقتراض .. بحلول شهر أغسطس اللي جاي .. لو سقف الدين ما اترفعش.. أو متوقفش العمل بيه مؤقتًا .. يعني شهرين بالكتير .. والفلوس ممكن تخلص.

وول ستريت .. أكبر سوق مالي في العالم .. والمحللين هناك .. بيتوقعوا إن الموعد النهائي ده هيكون بين أواخر أغسطس ومنتصف أكتوبر .. يعني الفترة اللي جاية دي فترة حرجة جدًا .. وممكن تحصل فيها تغييرات كبيرة.

رئيس بنك جي بي مورجان تشيس .. اللى يعتبر واحد من أكبر البنوك في العالم .. كان حذر من صدمة هتحصل  في سوق السندات الأمريكية .. بس  وزير الخزانة .. رفض التحذير ده .. وقال "أعرف  رئيس بنك جي بي مورجانمن زمان .. وطول عمره بيطلق تحذيرات زي دي .. ولحسن الحظ .. ولا واحد منها تحقق" .. يعني بيسنت بيقول إن الراجل بيحاول يخوف الناس .. وبيحاول يتوقع حاجات ممكن متحصلش.

بعيدًا عن سقف الدين .. فيه موضوع تاني مهم جدًا .. ودايماً بياثر على سعر الدولار .. وهو علاقة أمريكا بالصين .. ترامب الأسبوع اللي فات .. اتهم الصين إنها خرقت الهدنة اللي عملتها أمريكا معاها بخصوص الرسوم الجمركية في شهر مايو اللي فات.

لكن وزير الخزانة واثق إن الخلاف الأخير ده "هيتسوى" .. وهيحصل مكالمة تليفونية بين ترامب والرئيس الصيني شي جين بينغ "قريب جدًا" .. كيفن هاسيت .. مدير المجلس الاقتصادي القومي في البيت الأبيض .. أكد إن المكالمة متوقعة تحصل الأسبوع ده .. وقال .. "ترامب هيعمل محادثة عظيمة عن المفاوضات التجارية الأسبوع ده مع الرئيس شي.

المؤكد ان اللي بيحصل في أمريكا ده .. من حكاية سقف الدين .. للخلافات التجارية مع الصين .. كل ده ممكن يأثر بشكل كبير على سعر الدولار .. وقيمته في الأسواق العالمية .. واللي بدوره هيأثر على كل واحد فينا .. وعلى فلوسنا.