هل ممكن الفضة تسرق الكاميرا من الدهب وتبقى هي الملاذ الآمن الجديد؟ وإزاي المعدن الرخيص زمان.. بقى النهارده كنز للمستقبل؟ وإيه اللي حصل وخلى المصريين يتهافتوا على الفضة بالشكل ده؟ وازاي سعرها بيغلي هنا في السوق المحلي رغم إنها رخصت عالميًا؟.. في التقرير ده هنكشف مع بعض لغز صعود الفضة.. وهل تقدر فعلاً تزيح الدهب من على عرش الأمان المالي.

اللي متابع السوق كويس.. أكيد لاحظ إن أسعار الفضة ولعت فجأة في السوق المحلي.. في أبريل بس.. زادت بنسبة 6.7% رغم إن على مستوى البورصة العالمية.. الأوقية نزلت حوالي 4.6%.

وده يفتح سؤال مهم.. إزاي بتنزل بره وتغلى عندنا؟
السبب هنا واضح.. الطلب في السوق المحلي زاد بشكل كبير جدًا.. خصوصًا بعد ما الدهب عيار 21 طلع لمستويات تاريخية.. لمس 5 آلاف جنيه.. وبعدين نزل شوية وسعره دلوقتي حوالي 4630 جنيه.

ساعتها.. كتير من الناس بدأوا يسألوا: هو مافيش بديل أرخص؟
وكان الرد: أيوه.. الفضة

سعيد إمبابي المدير التنفيذي لمنصة آي صاغة قال إن الفضة بقت بديل ذكي خصوصًا للناس اللي ميزانيتها مش كبيرة.. بس عايزين يحافظوا على قيمة فلوسهم.. وكمان يحققوا ربح على المدى الطويل.. ووقال كمان إن الطلب دلوقتي متجه للسبائك.. سواء دهب أو فضة.. لكن الفضة بقت أكتر جاذبية.. بسبب سعرها اللي لسه في المتناول.

جورج ميشيل نقيب الجواهرجية صرح إن الطلب على الفضة زاد بنسبة 70% خلال آخر سنتين.. وده مش رقم صغير خالص.. فيه ناس بتشتري سبايك نص كيلو وكيلو.. مش بس جرامات.

الفكرة مش بس إن الفضة أرخص.. لكن كمان مصنعيتها أقل بكتير من الدهب.. يعني لو بتحسبها استثمار.. ممكن تطلع منها بفايدة أسرع.. مصنعية سبيكة الدهب 10 جرام بتكلفك حوالي 200 جنيه.. لكن بنفس المبلغ.. ممكن تشتري 800 جرام فضة.. ومصنعتها ما تعديش 5 جنيهات.

كمان الفضة بقت دلوقتي مش بس للمجوهرات.. لكن ليها استخدامات صناعية بتزود قيمتها من أول الإلكترونيات.. لحد الطاقة الشمسية.

المصريين كمان بقوا حريصين على الادخار.. ولو حتى بمبالغ بسيطة والفضة بتقدم حل ذهبي.. للناس اللي مش قادرة تجيب دهب.. لكن عايزة تحوش وتحافظ على فلوسها.

ده غير إن في شركات بقت بتقسط السبايك.. وتمد الحجوزات لشهور قدام بسبب الإقبال الرهيب الناس بتدور على الأمان.. والفضة دلوقتي بقت استثمار الضرورة.

وطبعًا.. في ظل التوترات العالمية.. والحرب التجارية.. وغياب الاستقرار الاقتصادي.. المعادن دايمًا بتبقى هي ملجأ الناس.. بس المرة دي.. الدهب مش لوحده في الصورة الفضة بتقول.. أنا كمان موجودة.. وممكن أكون بطل المرحلة الجاية.

السؤال بقى..هل الفضة هتقدر تزيح الدهب فعلًا؟ ولا دي مجرد فقاعة مؤقتة وهتنفجر؟ خلينا نتابع السوق.. ونشوف.. لكن اللي أكيد.. إن الفضة دخلت رسمي في سباق الملاذات الآمنة..وبدأت تاخد مكانها.. جنب الدهب.. مش وراه.