يا ترى هل ممكن الفضة تبقى بديل للدهب دلوقتي، خاصة في ظل جنون أسعاره، وليه اتحولت اهتمامات الناس للمعدن الرمادي بدل المعدن الأصفر؟، وهل ده معناه إن مكانة الملاذ الآمن اتغيرت عند البسطاء.

في الأيام الأخيرة، أسعار الفضة في الأسواق المحلية ارتفعا بنسبة 1.6%، وده كان بسبب ارتفاع سعر الأوقية في البورصة العالمية بنسبة 2.3%، خاصة في ظل حالة عدم اليقين الاقتصادي وتراجع أداء الدولار، بالإضافة لترقب الأسواق لنتائج المباحثات التجارية بين أمريكا والصين.

وحسب تقرير متخصص، ارتفع سعر جرام الفضة عيار 800 في السوق المحلي بقيمة 0.75 جنيه عشان يسجل 48 جنيه، بينما سجلت الأوقية في الأسواق العالمية ارتفاعًا قدره 0.73 دولار عشان توصل ل 32.69 دولار بنهاية الأسبوع، مقارنة بـ31.96 دولارًا في بدايته.

ونقدر نقول إن من أسباب ارتفاع سعر الفضة، هو هروب الناس العادية وكمان المستثمرين عليها بسبب صعود أسعار الدهب، فده انعكس بشكل إيجابي على الفضة.

وحاليا، الأسواق المحلية بتشهد طلب متزايد على الفضة خلال الفترة الحالية، بسبب تغير سلوكيات المستهلكين وتوجههم نحو بدائل للتحوط والادخار، مع الارتفاع الكبير في أسعار الدهب زي ما قولنا، وكمان أسهم طرح الشركات لسبائك فضة بأوزان مختلفة ساهم في تعزيز الإقبال، خاصة وإنها بتتماشى مع القدرات الشرائية للمستهلكين وسهولة إعادة بيعها، ده بجانب انخفاض أسعار الأونصة عالميًا إلى 32 دولار مقابل 33 دولار.

أما بقى على الصعيد العالمي، فاستفادت الفضة من الزخم الإيجابي اللي بيشهده سوق الدهب، في وقت كل الأسواق بتترقب فيه تداعيات الاتفاقات التجارية، زي الاتفاق اللي تم بين أمريكا وبريطانيا، واللي بيضمن الإبقاء على بعض ضرائب الاستيراد وتخفيف تانية، كمان المستثمرين ببترقبوا نتائج المباحثات الجارية في سويسرا بين أمريكا والصين، واللي بالتالي هتأثر على أسعار الفايدة وكمان أسعار الدهب والفضة.

كمان الإقبال على الفضة بيسجل زيادة يومية بنسبة 1%، عشان تتحول لملاذ آمن للبسطاء الهاربين من جنون أسعار الدهب. 

طب ليه تستثمر في الفضة؟

بص يا سيدي، الفضة بقت ملاذ آمن زيها زي الدهب، بل أصبحت بالفعل وجهة مفضلة لصغار المستثمرين، وده بسبب دخولها في صناعات كتيرة، زي السيارات الكهربائية، والطاقة الشمسية، والأدوات الطبية، وتحلية المياه وغيرها.

طب إزاي تتأكد من جودة الفضة؟

أول حاجة هتعملها هي تتأكد عند الشراء، إن في علامة مصلحة الدمغة والموازين على السبيكة، واسم الشركة المصنعة، وده بجانب انك تشتري من مصدر موثوق، واكتب البيانات الأساسية زي عدد الجرامات والتاريخ وقيمة المبلغ على الفاتورة.

والخلاصة، نقدر نقول إن الاستثمار في الفضة مربح جدا، خاصة وإن السوق ده شهد خلال آخر سنتين زيادة في الإقبال بنسبة تتراوح ما بين 50% و60%، خاصة من كبار السن من الرجال.

كمان، التوقعات رايحة على استمرار صعود أسعار الفضة عالميا ومحليا خلال الفترة الجاية، لأنها بتتأثر بالتطورات الجيوسياسية والاقتصادية اللي بيشهدها العالم.