ليه مصر بتفكر تخفض رسوم العبور في القناة بنسبة 12 لـ15%؟ .. وليه الخطوة دي جاية دلوقتي؟ .. وإيه اللي حصل في البحر الأحمر خلّى إيرادات القناة تتراجع بطريقة غير مسبوقة؟ 

قناة السويس مش بس ممر مياه .. دي واحدة من أهم مصادر العملة الأجنبية لمصر .. يعني لو القناة عطست .. الاقتصاد المصري كله ممكن يتصاب بنزلة برد .. في السنين اللي فاتت القناة كانت بتجيب إيرادات ضخمة .. في 2023 مثلًا .. إيراداتها وصلت لـ10.25 مليار دولار .. بس النهاردة  الوضع اتغير 180 درجة عشان أزمة البحر الأحمر.

خلونا نرجع لورا شوية .. من أواخر 2023 جماعة الحوثيين في اليمن بدأوا يهاجموا السفن في البحر الأحمر .. بيقولوا إنهم بيستهدفوا السفن اللي ليها علاقة بإسرائيل عشان يدعموا القضية الفلسطينية في غزة .. بس المشكلة إن الهجمات دي خلّت شركات الشحن العالمية تخاف .. شركات زي "ميرسك" الدنماركية وغيرها قرروا يغيروا مساراتهم .. بدل ما يعدّوا من البحر الأحمر وقناة السويس .. بقوا يلفوا حوالين إفريقيا من طريق رأس الرجاء الصالح .. الطريق ده أطول بكتير .. بيزود الرحلة حوالي 15 يوم .. وبالتالي بيزود تكاليف الوقود والتشغيل .. بس الشركات شايفة إنه أأمن من المرور في منطقة الحوثيين.

النتيجة كانت ان حركة الملاحة في قناة السويس اتقلّصت بشكل كبير .. في يناير 2024 .. عدد السفن اللي عدّت من القناة نقص بنسبة 30%.. والحمولة والإيرادات نقصوا بنسبة 41% .. وفي الربع الأخير من 2024 .. إيرادات القناة انخفضت من 2.4 مليار دولار لـ880.9 مليون دولار بس .. يعني خسارة حوالي 63% .. وفي تقارير بتقول إن مصر خسرت حوالي 6 لـ7 مليار دولار في أقل من سنة بسبب الأزمة دي.

وإيه علاقة ده كله بتخفيض رسوم العبور؟

لفريق أسامة ربيع .. رئيس هيئة قناة السويس .. قال إنهم بيدرسوا تخفيض الرسوم بنسبة 12 لـ15% .. والقرار ده ممكن يتطبق خلال أيام لو الرئيس عبد الفتاح السيسي وافق عليه .. الفكرة هنا إن مصر عايزة ترجّع السفن اللي بطلت تمر من القناة .. يعني بدل ما الشركات تخسر فلوس في طريق رأس الرجاء الصالح .. أو تدفع تكاليف تأمين عالية جدًا عشان تمر من البحر الأحمر .. القناة تقولّهم: "تعالوا عندنا .. هنخفضلكم الرسوم ونوفّر عليكم" .. ده غير إن التخفيض ده هيبقى مؤقت .. يعني لو الوضع في البحر الأحمر هدي .. ممكن الرسوم ترجع زي الأول.

اللي ساعد على التفكير في القرار ده كمان إن فيه بوادر أمل .. في اتفاق وقف إطلاق نار توسطت فيه سلطنة عمان بين أمريكا والحوثيين .. الاتفاق ده بيقول إن الحوثيين هيوقفوا هجماتهم على السفن الأمريكية .. وأمريكا هتوقف ضرباتها على اليمن .. بس الاتفاق ده ما بيشملش إسرائيل .. يعني الهجمات على السفن اللي ليها علاقة بإسرائيل ممكن تستمر .. وده بيخلّي شركات الشحن لسه مترددة.

وإيه اللي ممكن يحصل لو التخفيض ده اتطبق؟

المتوقع ان السفن ترجع تدريجيًا للقناة .. وده هيزود الإيرادات ويخفف الضغط على الاقتصاد المصري .. لكن لو الوضع في البحر الأحمر ما تحسنش .. أو لو الشركات فضلت خايفة .. التخفيض ده ممكن ما يجيبش النتيجة المطلوبه .. والخساير تستمر.