ليه منجم السكري للدهب طلع ترند النهاردة.. وليه الدكتور مصطفى مدبولي زاره الموقع النهاردة.. وايه حكاية الاستثمارات الجديدة في جبل الدهب الأكبر في المنطقة.

الدهب في مصر معدن قديم من آلاف السنين والمصريين استخرجوه واستخدموه في الزينة والمعاملات المالية كوحدة نقد ولسه فيه عشرات المناجم اللي المصريين القدماء استخرجوا منها الدهب موجودة لغاية دلوقتى.. يعني مصر أول دولة في العالم تعرف قيمة الدهب وتستخرجه وتشكله وتصنعه كمان وعشان كده الرئيس السيسي طلب أن مصر ترجع لمجدها القديم في صناعة الدهب وفعلا الدولة نجحت لحد كبير في الملف دا عن طريق استثمارات ضخمة في قطاع التعدين والتنقيب عن الدهب ودا اللي خلي مصر تدخل نادي أكبر 10 دول في. العالم تصديرا للمعدن الأصفر بحلول 2027 يعني بعن سنة ونص من دلوقتي.

طيب ايه الجديد في ملف الدهب؟
النهاردة الدكتور مصطفى مدبولي رئيس مجلس الوزراء ساب كل أشغاله وراح زار موقع منجم السكري بالصحراء الشرقية وعمل جولة طويل. هناك لمتابعة مراحل إنتاج خام الدهب  وتعرف على كل المراحل اللي تشمل تصنيف الخام الناتج من الجبل على حسب نسبة الدهب في الطن ثم مرحلة التكسير وبعدها الطحن وبعدها مرحلة الفصل للخام لغاية اخر مرحلة وهي فصل الدهب عن باقي العناصر التانية..

وقبل التفاصيل هنشوف الأرقام بتقول ايه..  إنتاج منجم السكري سجل حوالي 454 ألف أوقية دهب خلال 2024 وفي الوقت الحالي شركة أنجلو جولد أشانتي اللي بتشغل المنجم دلوقتي بتجري أعمال تنمية المنجم لتأكيد اكتر من 4.3 مليون أوقية دهب إضافية لاحتياطات المنجم في وقت وصلت فيه الاحتياطات المؤكدة ل 6.2 مليون أوقية..

الارقام بتقول كمان إن المستثمر هو اللي بيتولى تغطية كامل الاستثمارات بالمنجم لتحقيق خطة الإنتاج وتوفير فرص العمل والخدمات المرتبطة بالنشاط التعديني وفيه حوالي 4000 فرصة عمل مباشرة وغير مباشرة بيوفرها المنجم.

ألبيرتو كالديرون، الرئيس التنفيذي لشركة “أنجلو جولد أشانتي“ قال إن الشركة ناوية تضخ المزيد من الاستثمارات في منجم السكري خلال الفترة الجاية.. وقال كمان إنه بيتوقع وجود مواقع تانية جاذبة للاستثمارات مماثلة لمنجم السكري في مصر ولسه محدش اكتشفها لغاية دلوقتى وأن الشركة ناوية تستثمر اكتر في قطاع التنقيب عن المعدن الأصفر في مصر .

نيجي بقي للتفاصيل واللي بيتقول إن مصر ناوية تكون مركز إقليمي وعالمي في صناعة الدهب والصادرات كمان ودا لأسباب كتير جدا أولها مثلا أن مصر غنية بمناجم الدهب سواء المعروفة أو اللي لسه محدش اكتشفها وعشان كمان الدهب كل يوم في الطالع ومصر حققت أرقام قياسية في الصادرات وسجلت 3.2 مليار دولار في أول 3 شهور في 2025.. ولو استمرينا في نفس المعدلات هنصدر في سنة بحوالي 13 مليار دولار دا اكبر من إيرادات قناة السويس على سبيل المثال.. كمان الدهب بيعتبر أداة تحوط وأمان مالي للدول وزيادة انتاجه هيدي مصر ميزة كبيرة واستقرار في أسواق المال.