تابع أحدث الأخبار عبر تطبيق

أنا البيت اللى من أول بناه هالك

أنا ديونك

انا مالك

وانا مالك من المالكين

ما بنطقشى ولا كلمه عشان يكتبهم الملكين

وصوتى

أنين 

وضحكى حزين

ولو مره افتكرت أحلم

أكيد هحلم أكون

مسكين

أنا....

موش عارف أبقا أنا مين

أنا الفرحه اللى ما بتلبس ف يوم توبها

وتفضل ماشيه تتلفت

وم الحيرة

بترسم شوقها للضحكة على جراحها

وتتنطط

أنا          

أنا الضحكه اللى بتعيط

أنا الصرخه اللى بتزغرد

أنا الطفل إتولد ميت

وكان نفسه يعيشله

يومين

عشان يلحق ابوه يثبت

غداه ف بطاقه التموين

أنا....

موش عارف أبقا أنا مين؟؟؟

أنا الكرسى اللى يتخانقوا عليه بالشوم

أنا المشئوم

لا أنا قدره ولا المقسوم

ولو هعمل بحورى مهر

هيتعلم عشانى العوم

وناس بالكوم

هييحاربوا وهبيبوسوا ايدين لأجلى

ومن أجلى

يروح شهدا

وأرواح طاهره بترفرف على الميادين

أنا

موش عارف أبقا أنا مين؟؟؟