يا ترى مصر بتفكر إزاي عشان ترجع إيرادات قناة السويس لسابق عهدها وأكتر شوية، هل الحكومة عملت فكرة بره الصندوق عشان تجذب أكبر عدد من السفن الأجنبية اللي بتمر بالقناة، والخطة دي ممكن تبقى عاملة إزاي، هل هتشمل تخفيض رسوم العبور ولا هتقدم امتيازات جديدة للسفن؟.
في الساعات الأخيرة، في تقارير صحفية نشرت تصريحات للواء أسامة ربيع رئيس هيئة قناة السويس، بإنهم بيدرسوا تخفيض رسوم عبور السفن من القناة بنسبة من 12 لـ15%، خاصة في ظل هدوء الأمور في منطقة البحر الأحمر وتوقف هجمات الحوثيين بشكل كبير.
ونقدر نقول إن التصريحات المنقولة للواء ربيع، بتعتبر فرصة قوية للمستثمرين اللي بيستفادوا من قناة السويس في نقل بضايعهم من خلالها، يعني التخفيض ده هيوفر لهم تكاليف كتير يقدروا ييستفيدوا منها من ناحية، وكمان هيساهم في تعزيز إيرادات قناة السويس كمكسب لمصر من ناحية تانية.
ورغم إن مافيش قرار رسمي بتخفيض رسوم العبور لحد دلوقتي، إلا أن الاجتماع الأخير اللي عقدته هيئة قناة السويس مع ممثلي كبرى الخطوط والتوكيلات الملاحية العالمية بيعكس إدراك حقيقي من الهيئة للتحديات اللي بتواجه صناعة النقل البحري حاليا، وبيأكد إنها بتسعى بشكل جاد لتقديم حلول عملية وفعالة عشان تجذب أكبر عدد من السفن وترجع تاني للممر الملاحي الأهم عالميًا.
كمان، تأكيد الفريق أسامة ربيع على جاهزية الهيئة لتقديم حزمة شاملة من الخدمات البحرية واللوجستية، بالتزامن مع تحسن المؤشرات الأمنية في البحر الأحمر، بيعتبر تطور إيجابي جدًا ممكن يساهم في إعادة التوازن لحركة التجارة العالمية بعد فترة من التوترات والاضطرابات.
كمان، ممثلي شركات الشحن العالمية دلوقتي منتظرة تقديم حوافز مؤقتة وتخفيضات مدروسة على رسوم العبور، خاصة للسفن العملاقة وسفن الخطوط الطويلة، ودي هتمثل خطوة هامة الكل منتظرها، خاصة في ظل المنافسة القوية من ممرات بديلة ومحاولات بعض الدول لجذب حركة الشحن العالمية بعيدًا عن القناة.
عشان كده، مهم جدًا على قناة السويس، إن يتم الإسراع في التنسيق مع شركات التأمين العالمية عشان يتم إعادة تقييم أقساط التأمين المرتفعة المفروضة على السفن العابرة في منطقة البحر الأحمر، لأن تقليل التكلفة دي هيكون عامل جذب حاسم هيقدر يستعيد ثقة خطوط الشحن ويشجعها على العودة للمسار الطبيعي عبر قناة السويس.
ونقدر نقول، إن اللي بتشهده هيئة قناة السويس دلوقتي من تطور نوعي في مشروعات تطوير المجرى الملاحي والأسطول البحري، بجانب انفتاحها على شراكات دولية، بيعتبر ركيزة قوية لتعزيز مكانة مصر كمركز لوجستي إقليمي وعالمي، ولكن لازم مجتمع الأعمال البحري وشركات الشحن تدعم التوجه ده وتكثف التعاون مع الهيئة عشان نقدر نتخطى التحديات الحالية ونعلي مصلحة مصر ومصلحة اقتصادنا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق