يا ترى صندوق النقد الدولي بيقول إيه عن الاقتصاد المصري دلوقتي، الناس بدأت تسأل، هل في فعلا قال إن في تحسن اقتصادي، وإيه هي ملاحظاته على الإصلاحات اللي نفذتها الحكومة، وإزاي ده ممكن ينعكس على حياة المواطن العادي؟

صندوق النقد بيقولها بصراحة "مصر حققت تقدم ملحوظ في برنامج الإصلاح الاقتصادي الكلي"، وده مش كلام من فراغ، ده جاي بعد مؤشرات بدأت تتحسن زي انخفاض التضخم، وزيادة احتياطي النقد الأجنبي.

وجولي كوزاك، مديرة إدارة الاتصال بالصندوق قالت "إحنا شايفين مجهود واضح من الحكومة المصرية، وبندعم مصر في سعيها لبناء اقتصاد أقوى بقيادة القطاع الخاص"، وده يعتبر كلام مهم جدا وإيجابي عن الاقتصاد المصري.

طيب هل الكلام ده له علاقة بالقرض؟

بص يا سيدي، إجمالي القرض اللي صندوق النقد وافق عليه هو 8 مليار دولار،  تم صرف أكتر من دفعة منه، والدفعة اللي فاتت كانت بقيمة 820 مليون دولار، ودلوقتي الصندوق في مرحلة المراجعة الخامسة، ولسه الاجتماعات مستمرة بشكل أونلاين، عشان يتفقوا على آخر شوية إصلاحات، يعني لسه في دفعات جاية، بس مربوطة بالاتفاق النهائي على سياسات اقتصادية جديدة.

ومؤخرا، الصندوق قال إن المرحلة الجاية لازم مصر تسرع وتوسع في الإصلاحات، وتقلل دور الدولة في الاقتصاد، وتفتح الباب أكتر للقطاع الخاص، وتخلي المنافسة عادلة، يعني الكلام بيدور حوالين تشجيع الاستثمار، وتمهيد الطريق للقطاع الخاص، وخلق بيئة عمل أسهل، وكمان تقليل البيروقراطية.

بس المواطن العادي.. حاسس بإيه؟

التضخم نزل، وده معناه إن الأسعار مش بتكوي الناس زي زمان، كمان الاحتياطي الأجنبي زاد، يعني فيه استقرار أكتر في الجنيه قدام الدولار، أما بقى دور الحكومة، فهي محتاجة توصل الإصلاحات دي للشارع، من خلال فرص شغل، دعم حقيقي، وأسعار تكون في متناول الناس.

عندك كمان، بعد قرار خفض البنك المركزي لأسعار الفايدة بنسبة 1%، فمتوقع إن التضخم ينزل واستقرار الجنيه قدام الدولار، والقرار كمان بيأثر على السوق والاستثمار، يعني بيطمن المستثمرين اللي بيدوروا على العائد العالي من أدوات الدين، وبيخلي الاستثمار الحقيقي في الصناعة والسياحة والعقارات أكتر جاذبية.

يعني الخلاصة، إن اللي احنا بنشوفه دلوقتي هو بداية طريق جديد، للصندوق بيشجع مصر على الإصلاحات الاقتصادية والحكومة بتتحرك وشغالة بكل قوتها، والبنك المركزي بيظبط إيقاع السياسة النقدية، والأهم إن المواطن يبتدي يحس واحدة واحدة بفايدة كل ده على حياته.

يعني ممكن نقول إن اللي جاي أحسن بس محتاجين صبر، وقرارات ذكية، وهنشوف مصر في حتة تانية خالص.