لو لسه بتستخدم  تاريخ ميلادك أو رقم تليفونك ككلمة مرور لحساباتك البنكية.. فخد بالك انت فى خطر ولازم تغيرها فى أسرع وقت.. وفى التقرير ده هنقولك أحدث الطرق اللي البنوك بتستخدمها عشان تحمي حساباتنا من أي محاولة اختراق.. وهنعرف سوا ليه باسووردك ده أهم حاجة لازم تاخد بالك منها وتختارها بعناية .. وإزاي ممكن تخليه حصن منيع لفلوسك وأسرارك.

كتير مننا بيستهتر بكلمة المرور.. وبيفتكر إن أي حاجة سهلة هتعدي.. لكن في الحقيقة.. الباسورد الضعيف ده زي باب مفتوح للحرامي.. الهاكرز بيستخدموا برامج قوية جداً بتجرب ملايين الكلمات في ثواني.. ولو باسووردك سهل.. هيوصلوا له في لمح البصر.. عشان كده.. اختيار باسوورد قوي مش رفاهية.. ده أساس أمانك الرقمي والمالي..

'f إزاي تعمل باسوورد قوي ومحدش يقدر يخترقه؟

فيه قواعد ذهبية لعمل باسووردات متينة..أهمها ان كل ما الباسورد كان أطول.. كل ما كان أصعب في الاختراق.. حاول يكون من 12 حرف أو رقم أو رمز على الأقل.. , متعتمدش على الأرقام بس.. أو الحروف الصغيرة بس.. لازم الباسورد بتاعك يكون خليط من حروف كبيرة كابيتال يعني وحروف صغيرة Small بالاضافة الى الأرقام وكمان يا ريت تزود رموز خاصة.

وابعد تماماً عن تاريخ ميلادك.. اسمك.. اسم ابنك.. رقم تليفونك.. أو أي معلومة سهل تخمينها.. دي أول حاجات الهاكرز بيجربوها.

ولو عندك أكتر من حساب يفضل ان كل حساب ليه باسوورد خاص بيه.. ودي نقطة في غاية الأهمية.. لو استخدمت نفس الباسورد لكل حساباتك.. إيميل.. بنك.. فيسبوك.. انستجرام.. يبقى لو هاكر اخترق حساب واحد بس.. هيقدر يدخل على كل حساباتك التانية.. استخدم باسوورد مختلف لكل خدمة.

وايه أحدث تقنيات تأمين الحسابات البنكية حاليا؟

البنوك دلوقتي بتستخدم أحدث التكنولوجيا عشان تحمي فلوسك وبياناتك.. مش بس بتعتمد على الباسورد.. لكن بتضيف طبقات حماية إضافية منها التحقق بخطوتين .. ودي أهم وأقوى طريقة بعد الباسورد.. لما بتيجي تسجل دخول لحسابك.. بعد ما تكتب الباسورد.. البنك بيبعتلك كود سري على موبايلك OTP أو عن طريق تطبيق خاص بالبنك.. مش هتقدر تدخل إلا لما تدخل الكود ده.. كده.. حتى لو الهاكر عرف الباسورد بتاعك.. مش هيقدر يدخل من غير موبايلك.. فعل الخاصية دي على كل حساباتك.

وفيه كمان حاجة اسمها التعرف البيومتري .. زي ما قولنا قبل كده.. البصمة والصوت والوجه.. استخدام بصمة صباعك أو بصمة وشك للدخول على تطبيق البنك أو الموافقة على العمليات.. بيوفر أمان غير عادي لأنها حاجات خاصة بيك أنت ومستحيل تتزور.

والبنوك بتستخدم أنظمة ذكاء اصطناعي متطورة بتراقب كل حركة على حسابك 24 ساعة في اليوم.. لو اكتشفت أي حركة مشبوهة أو غير معتادة.. زي سحب مبلغ كبير فجأة.. أو محاولة دخول من دولة غريبة.. بتوقف العملية فورا وبتتواصل معاك عشان تتأكد..

وخليك دايما فاكر.. الباسورد بتاعك مش مجرد كلمة.. ده مفتاح حساباتك .. استثمر وقت ومجهود في اختيار باسووردات قوية ومختلفة.. وفعل خاصية التحقق بخطوتين على كل حساباتك.. وخليك واثق إن البنوك كمان بتعمل كل اللي عليها عشان تحميك.. الأمان الرقمي مسؤولية مشتركة.. وإزاي تحمي نفسك بيبدأ من اختيارك للباسورد.. خليك صاحي.. خليك آمن.