ايه اللي بيحصل في البنوك النهاردة وايه اللي حصل في الصاغة المصرية.. وايه سر الارتفاعات الكبيرة في الأسعار وايه علاقاتها باللي بيحصل حولينا في المنطقة والاسعار رايحة على فين في الأيام الجاية.
زي ما توقعنا في بانكير النهاردة أسعار الدولار والدهب ارتفعت بشكل ملحوظ وكبير في البنوك والصاغة وحصلت تقلبات كبيرة في سعر الدولار على سبيل المثال ووصل في أول التعاملات 50.71 حنيه قبل ما ينزل شوية ويوصل 50.50 جنيه وممكن الأسعار تتغير في أي وقت ونفس الأمر حصل في الصاغة وسعر جرام 21 قرب على 5 آلاف جنيه في أول التعاملات وسجل 4900 جنيه من غير المصنعية.. وبنقول زي ما اتوقعنا لأن اللي بيحصل حولينا في المنطقة من حروب كان ليها تأثير مباشر على الأسواق العالمية ومن بينها الأسواق المصرية.
اولا الدهب معدن بيتاثر بشدة باي توترات عالمية كبيرة لأنه ملاذ آمن والطلب عليه بيزيد بشكل كبير في الأوقات الصعبة والتوترات ولأن الصراعات في العالم وصلت لمرحلة خطيرة بعد تجدد الهجمات بين الكيان الإسرائيلي وإيران ووصولها لمنشآت اقتصادية مهمة زي محطات استخراج النفط وحقول الغاز والموانئ ودا عمل زلزال في الأسواق العالمية وطبيعي الدهب يقفز سعره.. الاصعب إن الدهب هيستمر في الصعود في حالة استمرار الأوضاع المتوترة في الشرق الأوسط وكمان الصراع الاقتصادي بين الولايات المتحدة الأمريكية ودول العالم بخصوص الرسوم الجمركية الأمريكية وخاصة مع الصين وأوروبا.
ثانيا الدولار.. طبيعي سعره يرفع بشكل كبير بسبب الارتفاعات العالمية في أسعار النفط بعد استهداف منشآت نفطية في إيران وإسرائيل وتأثر خطوط الملاحة ونقل الخام من أهم مناطق استخراجه في العالم وهي منطقة الخليج العربي وبالتالي ارتفاع أسعار السلع عالميا مع ارتفاع تكلفة الشحن وسعر الخام نفسه ومصر طبعاً دولة مستوردة وهتحتاج مبالغ إضافية لفاتورة الاستيراد ودا هيعمل ضغط على الطلب على الدولار في السوق المحلية ودا غير مخاوف تأثر قطاعات اقتصاديه تانية زي الاستثمارات والسياحة وغيرها واللي بتهرب مع ارتفاع حدة التوتر في المنطقة.
طيب الوضع ده هيستمر لغاية امتى؟
زي ما قلنا لحضراتكم الأمور هتفضل صعبة مع استمرار التوتر في المنطقة واللي مصر بتتاثر بيه بقوة بسبب التأثير على قناه السويس وايرادات القناة مع عودة التوترات في البحر الأحمر بعد الهجمات الإسرائيلية على قواعد الحوثي وتأثر السياحة وبقية الأسواق.. لكن في نفس الوقت الصورة مش سودا اووي لأن مصر عندها احتياطي نقدي قوي ولسه مفيش تأثير ملموس على التدفقات الاستثمارية وموارد الدولار التانية زي تحويلات المصريين والتصدير والساعات الجاية هي اللي هتحدد اتجاه الأزمة في المنطقة رايحة على فين.
الحكومة من ناحيتها بتسابق الزمن عشان تخفف من حدة الأزمات الأخيرة في المنطقة واعلنت عن توافر مخزون كبير من السلع الاستراتيجية والمواد البترولية لمواجهة أي تطورات اقتصادية خطيرة واصعب الإحتمالات اللي ممكن تحصل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق