مفاجآت وأرقام وإنجازات.. ايه اللي في مصر من دلوقتي ولغاية 2030.. وازاي العالم بدأ يتنبأ بقوة مصر الاقتصادية القادمة.. ياترى الأرقام بتقول ايه.

مصر زي ما احنا عارفين عملت رؤية استراتيجية لغاية 2030 هترسم فيه شكل اقتصادها الجديد والنمو والتطور التجاري والتخلص من كل المعوقات اللي لتواجه الاستثمار والانطلاق وعشان توصل لحجم اقتصاد تقدر تبني عليه الأجيال الجاية ويكون منصة انطلاق وسط الاقتصادات الكبرى في العالم.

لغاية النهاردة رؤية 2030 ماشية كويس جدا رغم الأزمات العالمية الصعبة والمطبات اللي حصلت في المنطقة والصراعات اللي أثرت على إيرادات قناة السويس وأزمات العملة.. لكن الدولة قدرت تعدي منها كلها وتحقق أرقام كويسة جدا في المؤشرات الاقتصادية..

طيب العالم شايف الاقتصاد المصري رايح على فين ؟
صندوق النقد الدولي واحد من المؤسسات المالية المعتمدة عالميا بخصوص الأرقام والمؤشرات والتقييمات الخاصة باقتصاديات الدول ورأيه هو اللي بيحبك عجلة الاستثمار والنمو في أي بلد..  المهم الصندوق طبع تقرير مهم في الساعات الأخيرة توقع فيها وصول صادرات العام المالي الحالي بـ 63.7 مليار دولار مع توقع زيادتها إلى 74 مليار دولار في العام المالي الجاي..  وفي نفس الوقت توقع الصندوق ارتفاع الواردات من 98.7 مليار دولار حاليا إلى 104.4 مليار دولار السنة الجاية..

وخلوا بالكم من الأرقام الصندوق بيقول صادرات مصر هتوصل لحوالي 64 مليار دولار السنة دي مقابل 40 مليار دولار السنة اللي فاتت يعني بنتكلم في فرق كبير 24 مليار دولار والفرق دا هيزيد السنة اللي جاية وهيوصل 34 مليار دولار تقريبا يعني في سنتين مصر رفعت الصادرات للضعف تقريبا ودا إنجاز قياسي للحكومة وبياكد إن مصر هتحقق قريب رقم ال145 مليار دولار صادرات.

الدكتور مدبولي اتوقع من ناحيته إن في سنة 2030 هتوصل واردات مصر الى 105 مليار دولار وصادراتها إلى 115.8 مليار دولار يعني هيكون فيه فائض 10 مليارات دولار..  ودا قبل رفع سقف التوقعات الي أرقام أكبر وهي 145 مليار دولار ودي كلها أرقام قابلة للزيادة لأنها أرقام ترجيحية... وعلي فكرة في نفس المدة دي مصر بتستهدف تحقيق  300 مليار دولار بحلول 203 لتعزيز صلابة ومرونة الاقتصاد المصري في مواجهة الأزمات.

ونرجع لصندوق النقد وتوقعاته عن الاقتصاد المصري وهنلاقي ان الصندوق توقع  تراجع العجز التجاري بنسبة 30% خلال العام المالي الجاي ليصل إلى 14.2 مليار دولار، مقارنة بـ 20.2 مليار دولار بنهاية العام المالي الحالي.. والحساب الجاري لو بتسأل عليه هو عبارة عن مقياس للفرق بين صادرات مصر من السلع والخدمات واللي بتستورده بالإضافة إلى تحويلات المصريين العاملين بالخارج.

خد المفاجأة دي كمان الصندوق توقع وصول  حجم الاقتصاد المصري إلى 586.9 مليار دولار بحلول سنة 2030، ليحافظ على مكانته كتالت أكبر اقتصاد عربي وفي صدارة اقتصاديات أفريقيا .. طبعا كل دا بيقول مصر رايحة على فين.. وإنه بعد 5 سنين من دلوقتي مش هيكون فيه أزمة دولار لكن بالعكس هيكون فيه وفرة في النقد الأجنبي وارتفاع في سعر الجنيه واستقرار كبير في الأسواق وانتعاشة في القطاعات الاقتصادية والتجارية.