أسعار الذهب خلال الأيام اللي فاتت وصلت لأرقام قياسية لأول مرة في التاريخ.. ياتري هل الاسعار دي اثرت علي مشتريات المصريين من المعدن الاصفر.. واية توقعات اسعار الذهب خلال الفترة اللي جاية.

اسعار الذهب في الوقت الحالي بقت من الحاجات اللي بتشغل بال ناس كتيرة جدا في الشارع المصري خصوصا الناس المهتمة بالاستثمار والأوعية الأدخارية، خصوصا أنهم بيكونوا عندهم حب استطلاع لمعرفة مستقبل الأسعار والتوقعات للأوعية الأدخارية الموجودة في السوق المصري، وخلال الأيام اللي فاتت مكنش فيه كلام غير علي اسعار الذهب والتوقعات الاسعار هتروح فين، وهل الأسعار هتكمل ارتفاعات تانية ولا هتكون مستقرة خلال الفترة اللي جاية.

الأيام اللي فاتت اسعار الذهب في مصر سجلت ارقام تاريخية وتخطي سعر الجرام عيار 21 واللي هو الأكثر مبيعا وانتشارا في مصر خصوصا في القري والمحافظات أكثر من 5000 جنية للجرام، ودي اعلي قيمة وصل لها سعر الذهب في مصر، والسبب الاساسي في الارتفاع الكبير اللي وصل له سعر الذهب في مصر كان الحرب التجارية العالمية اللي بين اكبر قوتين اقتصادتين في العالم وهما الولايات المتحدة الأمريكية والصين، واللي موجودة حاليا بسبب الرسوم الجمركية الجديدة اللي فرضها الرئيس الأمريكي دونالد ترامب والرد الصيني اللي جه عليها بفرض رسوم جمركية وصلت لأكثر من 125% علي الرسوم الأمريكية.

الرسوم الجمركية الامريكية مش هيا بس السبب الرئيسي في الارقام القياسية اللي وصلت لها اسعار الذهب في مصر، ده كمان قرار لجنة السياسات النقدية بالبنك المركزي بخفض اسعار الفايدة في مصر بنسبة 225 نقطة اساس، كان له دور مهم جدا في ثبات واستقرار ارتفاع اسعار الذهب في مصر، خصوصا أن القرار ده تسبب في تحول جزء كبير من عملاء شهادات الاستثمار الأدخارية للاستثمار في الذهب، خصوصا أن الذهب بيعد ملاز أمن وبعيد تمام البعد عن المخاطر، وكمان في الفترة اللي فاتت محقق مكاسب كبيرة جدا سواء كان علي المستوي العالمي أو حتي علي المستوي المحلي واللي ارتفع بسبب تاثره بالاسعار العالمية للمعدن الأصفر.

طيب هل يا تري الارتفاعات دي اثرت علي مشتريات المصريين خلال الربع الأول من 2025؟.
ايوة طبعا، مشتريات المصريين من الذهب اتاثرت وبشده خلال الربع الأول من 2025 بسبب الارتفاع الكبير اللي حصل في اسعار الذهب وه اللي اكده مجلس الذهب العالمي، واللي قال أن مشتريات المصريين من الذهب تراجعت بنسبة 16%، ومشتريات المصريين من الذهب سجلت 11.1 طن خلال الربع الأول من 2025 مقابل 13.2 طن خلال نفس الفترة من السنة اللي فاتت، 
تقرير مجلس الذهب العالمي قال كمان أن مشتريات المصريين من المشغولات الذهبية تراجعت لـ 6.4 طن خلال الربع الأول من العام الحالي، مقارنة بنسبة 8 أطنان في الفترة نفسها من السنة اللي فاتت.