يا ترى إيه اللي خلّى سوق الدهب في مصر ينهار النهاردة؟ .. سعر جرام الدهب عيار 21 وصل 4580 جنيه .. رقم يخلّيك تسأل: هو الدهب فعلاً بقى رخيص ولا دي حركة مؤقتة؟ .. والأهم من كده .. إيه علاقة اللي بيحصل ده بنهاية الحرب التجارية بين أمريكا والصين؟ .. وهل الأيام الجاية هتشهد هبوط أكتر ولا الدهب هيرجع يرفع تاني؟

فى الساعات الأخيرة  سوق الدهب في مصر بيشهد حالة من الهبوط الحاد .. جرام الدهب عيار 21 اللي كان من أيام قليلة بيتراوح بين 4700 و4800 جنيه .. وصل النهاردة لـ 4580 جنيه .. يعني انخفاض أكتر من 100 جنيه في يوم واحد .. لو بتفكر تشتري دهب للجواز أو تستثمر في سبيكة .. أكيد الرقم ده لفت انتباهك.

بس السؤال: إيه السبب ورا الهبوط ده؟ .. وهل فعلاً زمن الارتفاعات انتهى؟

الإجابة بتبدأ من الخارج .. تحديدًا من الأخبار اللي طلعت عن الحرب التجارية بين أمريكا والصين .. الاتنين دول كانوا في صراع اقتصادي طويل بسبب الرسوم الجمركية .. أمريكا بتفرض رسوم على البضايع الصينية .. والصين ترد بنفس الطريقة .. التوتر ده كان بيزوّد الطلب على الدهب عالميًا .. ليه؟ .. لأن الدهب بيعتبر ملاذ آمن .. يعني لما الاقتصاد العالمي يبقى في حالة عدم استقرار .. المستثمرين بيهربوا للدهب عشان يحافظوا على فلوسهم .. بس النهاردة الوضع اتغير.

أمريكا والصين أعلنوا عن اتفاق مبدئي لخفض الرسوم الجمركية .. يعني التوتر اللي كان بيرفع أسعار الدهب بدأ يهدى .. النتيجة؟ .. سعر الأونصة عالميًا انخفض بنسبة 2% تقريبًا ووصل لحوالي 3300 دولار .. وده أثر مباشرة على السوق المحلي في مصر .. لأن أسعار الدهب عندنا بتتحرك مع الأسعار العالمية وسعر الدولار .. ومع استقرار سعر الدولار في البنوك المصرية .. الدهب حسّ بالضربة وهبط بشكل ملحوظ.

طيب .. إيه اللي ممكن يحصل الأيام الجاية؟

هنا لازم نبقى حذرين .. السوق دلوقتي في حالة ترقب .. لو استمر الاتفاق بين أمريكا والصين والبضايع بدأت تتحرك بسهولة بين البلدين .. ده ممكن يقلل الضغط على الدهب ويخلّي أسعاره تستقر أو تنزل أكتر .. يعني لو بتفكر تشتري دهب .. ممكن تنتظر يومين تلاتة تشوف السوق هيروح فين .. بس في نفس الوقت .. لو ظهرت أي توترات جديدة .. زي مشاكل جيوسياسية أو قرارات مفاجئة من البنوك المركزية .. الدهب ممكن يرجع يعلى تاني .. لأن المستثمرين هيرجعوا يشتروا بسرعة.

نصيحة ليك لو بتفكر تستثمر .. تابع الأخبار العالمية كويس .. قرارات الاحتياطي الفيدرالي الأمريكي بخصوص الفايدة .. وأي تطورات في العلاقات بين أمريكا والصين .. كل ده بيأثر على الدهب بشكل مباشر .. ولو عايز تشتري مشغولات دهبية .. خلّي بالك من المصنعية .. لأنها بتتراوح بين 100 و200 جنيه للجرام حسب المحل والمنطقة.