كشفت الكاتبة والمؤلفة منة القيعي عن كواليس كتابتها لأغاني مسلسلات شهر رمضان 2025، وذلك بعد حصولها على 7 جوائز في مسابقات فنية مختلفة.
منة القيعي: كتبت أغاني مسلسلات رمضان وأنا على جهاز التنفس
وكتبت منة القيعي في منشور عبر حسابها الشخصي على موقع التواصل الاجتماعي فيسبوك، رصده موقع تحيا مصر: بوست طويل وحكاية ماكنتش ناوية احكيها.. بس هحكيها.. من ٧ شهور واحنا لسة بنسخن عشان نحضر لشغل رمضان، حسيت بصعوبة في التنفس كانت بتزيد كل يوم الي ان تحول الموضوع لنوبات اختناق تقريبا.. كانت بتتسبب فس تسارع في ضربات القلب توصل ل ١٨٠ ى١٩٠ واوقات كتير الموضوع كان بيطول كنت بحس اني مش هعديها.
وتابعت منة القيعي: بعد شهر واتنين من الفحوصات والتشخيصات المختلفة جالي نوبة من دول وانا سايقة وتسببت في حادثة كانت صعبة شوية، راحت فيها عربيتي والحمد لله برضه نجوت منها باصابات خفيفة وكنا بنحمد ربنا الف حمد.. بعدها الامور تدهورت اكتر، والنوبات كانت بتوصل لمرتين و٣ و٥ في اليوم الواحد.
منة القيعي تروي موقفًا مؤثرًا
واستطردت: فيه ايام كنت بوقف عربيات ناس ماعرفهاش في الشارع واقولهم خليكوا معايا من الخوف. وابتديت رحلة علاج طبيعي للتنفس وكنت حرفيا بتعلم ازاي اتنفس من الاول.. واليوم اللي كنت بتنفس فيه "صح" لدقيقة متواصل كنت بعيط من الفرحة.. ويوم بيعدي ويوم احس انه مابيعديش لحد ما وصلنا لهنا.
منة القيعي: كنت بعيط وأنا بكتب الأغاني
وأضافت: ال ٧ شهور دول هما اللي ربنا كرمني فيهم ب الاغاني دي.. صاحبي يا صاحبي وكل سنة وتقابل حبيب والي اخره من الشغل اللي اتعرض في رمضان ٢٥.. اغاني منهم اللي اتكتبت وانا في مستشفي واللي اتكتبت وانا علي جهاز تنفس واللي اتكتبت وانا بعيط.. فيه ايام من الاحباط كنت بفكر ابطل احاول اخف.. بس عمري ما فكرت ابطل كتابة.. وكنت بدعي ربنا يكرمني ويجازيني وكنت بكلمه واقوله يارب وقفني ووقفني علي رجلي تاني.. اللهم لك الف حمد وشكر ٧ جوايز حصيلة ٧ شهور مروا بكرم الله ولطفه وفيه جايزتين مش معايا.. شكرا لاهلي وعيلتي وجوزي وصحابي والناس اللي اشتغلت معاهم كلهم.. طلعت عنيكوا وقلقتكوا وعملتلكوا ازعاج واستحملتوني.. شكرا من كل قلبي.
0 تعليق