هو ازاي اقتصاد مصر رايح للعالمية بخطوات واثقة.. والرئيس السيسي عمل وبيعمل ايه عشان مصر تاخد مكانتها الطبيعية.. والأرقام بتقول ايه.. وليه الوقت الحالي بيعتبر فرصة تاريخية للانطلاق.
في الاقتصاد لو وقفت محلك سر هتضيع وترجع للخلف وعشان كده فيه منافسة شرسة بين الدول على الأسواق وفي صراع على النفوذ الاقتصادي والانتشار وتسويق المنتجات وفي حرب ساخنة في قطاعات التكنولوجيا و الابحاث والابتكار والتطور للسيطرة على أدوات التجارة الحديثة واللي بتتطور بسرعة الصاروخ لغاية ما وصلنا لزمن الاقتصاد اللي بيعتمد على الروبوتات والذكاء الاصطناعي والشرائح الإلكترونية.. يعني اللي هيتعب ويخسر هيتراجع ومش هيكون ليه مكان وعشان كده بردو هنلاحظ إن فيه خريطة جديدة ببشكل في الاقتصاد العالمي وفيه صراع لا يتوقف بين الولايات المتحدة والصين من ناحية وبين أوروبا والصين وروسيا من ناحية تانية وبين اليابان والنمور الآسيوية وبقية المتنافسين في العالم.
طيب ازاي مصر تستغل التغيرات دي في بناء اقتصاد عالمي وقوى؟
مصر في عهد الرئيس السيسي بدأت فعلا تأسس اقتصاد صح قادر على الانطلاق والمنافسة والسيسي اعتمد على موقع مصر الجغرافي للانطلاق الاقتصادي بعد بناء بنية أساسية متطورة وقوية قادرة تستوعب اي توسعات اقتصادية.. الرئيس السيسي استغل علاقاته القوية بدول العالم المؤثرة اقتصاديا في بناء شراكات استراتيجية قوية في كل المجالات ودا بعد تهيئة الدولة المصرية تكون أسواق جاذبة للاستثمار بكل انواعه.
مصر انطلقت اقتصاديا بالفعل من خلال جذب استثمارات ضخمة ولسه فيه استثمارات في الطريق من خلال الشراكات الاستراتيجية اللي قلنا عليها خاصه مع الصين وأوروبا والخليج العربي واللي بدأت بالفعل تتنافس على السوق المصري وشفنا اللي بيحصل في اقتصادية قناة السويس والمناطق الصناعية للصين وروسيا وأوروبا والهند وامريكا كمان وشفنا خطط توطين الصناعة والقفزة في قطاع الزراعة لتحقيق الأمن الغذائي القومي وتوطين التكنولوجيا الحديثة في كل مجالات الاقتصاد وكمان توسيع الطريق للانطلاق القطاع الخاص في المشروعات.
كل دا تزامن مع انتصار مصر في معركة الدولار ونجاحها في تحقيق قفزات دولارية في التصدير والسياحة والتحويلات والاستثمار ولسه قناة السويس راجعة وتحسن المؤشرات الاقتصادية والمالية والتوقعات الدولية بتحقيق مصر معدلات نمو قوية في الاقتصاد والتجارة وضيف لدا كله إن مصر بفضل بنيتها التحتية القوية خاصه في مجال الطاقة والطرق والموانئ واللوجستيات وشبكات السكك الحديدية قدرت تستعد أنها تكون مركز إقليمي للصناعة والتجارة ونقل البضائع.
كل التطورات الاقتصادية الأخيرة في مصر رغم الظروف الخارجية الصعبة اللي حولينا دفعت المؤسسات المالية الدولية والإقتصادية العالمية تعدل توقعاتها للاقتصاد المصري وترفع أرقامها في معدلات النمو وقالت إن الاقتصاد المصري هيكون أكبر اقتصاد في الشرق الأوسط بحلول 2050 والسابع عالمياً في 2075 ودا كلام مؤسسات عالمية مش كلامنا.
طيب ازاي مصر تستغل الظروف الحالية لتسريع عملية انطلاق اقتصادها؟
لو بصينا على الخريطة الجديدة هتلاقي الصين بتصعد ومعاها أوروبا بعد ترتيب أولوياتهم الاقتصادية بعيدا عن الدولار وعن الولايات المتحدة بسبب الحروب التجارية اللي شنها ترامب على كل الدول ومع الصعود المستمر التنين الصيني واللي مصر بترتبط بيه بشراكات استراتيجية مهمة وفيه استثمارات صينية ضخمة في مصر دلوقتي ولسه فيه استثمارات جديدة ضخمة جاية مع زيارة الرئيس الصيني المرتقبة لمصر وكمان مصر عندها شراكات استراتيجية مع الاتحاد الأوروبي وعندها ميزة القرب الجغرافي معاها وتقدر وبدأت بالفعل في توطين الصناعات الصينية والأوروبية في مصر وتحولها لمركز صناعي للتكتلات الاقتصادية الجديدة ودا كله بيصب في الاقتصاد المصري واللي بينطلق من التنوع الكبير في الأنشطة الاقتصادية يعني مصر عندها اكتر من قطاع اقتصادي واعد قادر لوحده إنه يقود الاقتصاد المصري للعالمية زي السياحة والصناعة والتجارة والنقل واللوجستيات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق