يا ترى إيه هي فوايد طرح الحكومة للصكوك الفترة دي، هل بتستهدف خفض الدين العام للدولة، ولا هدفها هو جذب مستثمرين جدد، وليه أخدت الخطوة دي دلزقتي بالذات، خاصة صكوك البحر الأحمر، وإيه هي فوايده على اقتصادنا؟ 

في الحقيقة، الصكوك هي مش حاجة هدفها بيع أصول الدولة زي ما البعض فاكر، لأ خالص، هي عبارة عن إن الدولة بتطرح أصل، زي قطعة أرض مثلا وبتدي للمستثمرين حق انتفاع بيها لمدة معينة، وبعد كده بترجع تاني للدولة، يعني الملكية محفوظة بالكامل للحكومة.

ونقدر نقول إن الهدف من الخطووة دي، هو إننا نوفر سيولة للخزانة العامة، ونقلل شوية من فاتورة الدين اللي عاملة ضغط كبير على الموازنة.

كمان، الصكوك بتعتبر أداة استثمارية خارج الصندوق، لأنها بتساعد على جذب رؤوس أموال من سواء بره أو جوه، وده اللي احنا محتاجينه دلوقتي بالظبط.

وبرضو، الصكوك بتدي نوع من الثقة، لأن الدولة لسه ماسكة الأصل، ومجرد  بتستخدمه كضمانة للحصول على تمويل بشروط معينة، يعني بنستغل مواردنا بشكل ذكي من غير ما نفرّط فيها.

ومن أهم الفوايد المباشرة للصكوك دي، عي خفض الدين العام، وكمان تخفيف أعباء خدمة الدين اللي بتاكل جزء كبير من الموازنة، بجانب استغلال الأصول الحكومية اللي ممكن تكون مهملة، وتحويلها لمشروعات إنتاجية أو خدمية، وبرضو توفير فرص عمل جديدة.

عندك برضو، ممكن تبقى بداية لتعاون أكبر بين الجهات الحكومية والشركات الخاصة أو حتى مستثمرين أجانب، من خلال شراكات في المشروعات اللي هتقام على الأراضي دي، وده بيخلق حركة في السوق وبيزود الاستثمارات.

ونقدر نقول كمان، إن الخطوة دي مهمة ومؤقتة، لكن لازم تكمل بخطط إنتاجية حقيقية، يعني لازم نفكر دايما في حلول اقتصادية طويلة المدى وبره الصندوق.

والخلاصة هي إن لو الحكومة قدرت تطبق النموذج ده بشكل احترافي، مع ضمان إن الأصول تفضل ملك الدولة، وكمان قدرت تجذب استثمارات محترمة من خلالها، يبقى فعلا الصكوك دي كنز وممكن تبقى نقلة نوعية في طريقة تمويل الاقتصاد المصري، وكمان تفتح باب للاستثمار الأجنبي اللي احنا محتاجينه الفترة دي.