رد الإعلامي محمود سعد على أسئلة الجمهور، بعد تعليقه على أزمة ورثه الفنان محمود عبد العزيز والمذيعة بوسي شلبي، عبر صفحته على "الفيسبوك"، ولم يتصل بهما تليفونيا.
ونشر محمود سعد على صفحته على موقع التواصل الاجتماعي "الفيسبوك": "ردا على التعليقات، ليه كتبت بوست في قصة أبناء محمود عبد العزيز مرفعتش التليفون وكلمتهم؟.
وتابع:" هو أنا ما عنديش تليفون لا محمد ولا كريم ده أول حاجة، بس طبعا كان ممكن اجيبه، لكن لما بدأت القصة تابعتها زي حضراتكم، وأنا ماعنديش معلومات اكتر من اللي قاله الناس".
وأضاف: "الكلام مش لطيف، والتفاصيل دمها تقيل، الحقيقة أني قلت يعني أنا مش عايز أبقى بضغط عليهم، أنا بحبهم من وهما صغيرين وهما دلوقتي كبروا وبقوا نجوم وشخصيات كبيرة يقدروا ياخدوا قراراتهم بنفسهم مية في المية، وأنا ماحبش ابقى وصي على حد".
وأشار: "فلقيت انه الاسلم ان انا اكتب كلمتين، هم شافوهم ماشافوهمش مش مشكلة، في حاجة بتعملها أحيانا مش بتريحك قوي لكن بتحل مشكلة قابلتك، أنا قابلتني مشكلة إن في تجريح كده وكلام على محمود عبد العزيز وأحنا متفقين كلنا كده أنا وأحمد ومحمود والمجموعة دي أن أحنا ندافع عن بعض".
مش عايزين شوشرة
وأوضح: "قلت اكتب كلمتين، الكلمتين دول أنا حاسسهم بجد انه يا جماعة لموا الحكاية دي.. مش عايزين شوشرة، كتبت كلمتين هم يعملوا بيها أو ما يعملوش هم مش ملزمين قدامي في حاجة، لو اتكلمت في التليفون يبقى أنا الزمتهم بأنه اللي أنا بقوله ده يصح انهم يعملوه، لا ماقدرش الزمهم ولا احب ان انا الزمهم".
واستطرد: "ففوجئت تاني يوم بأن محمد بيدور عليا وجاب تليفوني وكلمني وقعدنا نتكلم كتير، شكرته على أنه أهتم وهو شكرني على أني اهتميت وكانت مكالمة كويسة.. بس هي كل الحكاية".
وأردف سعد: "فأنا مش حابب اورطهم خالص، ولا حابب ادخل في القصة دي لان ادخل فيه اعمل ايه، ده خلاف بين الناس على شيء ما. يعني انا عرفت جزء منه لكن الباقي ما عرفتوش، فانا ما اتدخلش".
واختتم حديثه: "في حد قاللي قول رأيك بصراحة أقول رأيي في ايه؟ سيدة كانت مرتبطة بمحمود عبد العزيز وفي مشكلة بينها وبين ولاده وولاده، أنا أقول رأيي في ايه؟ أنا بس أقول يا جماعة لموا الموضوع بلاش شوشرة.. يا جماعة تصافوا مع بعض، يا جماعة روحوا المحكمة من غير ما تكتبوا على السوشيال ميديا، فحتى محمد قال لي انا ما عملتش حاجة، غير لما طلع الكلام من الجهة التانية رحت مطلع بيان انا وكريم وما اتكلمتش خالص، بس هي دي كل الحكاية".
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق